3 reviews for Kitab al-Tajalliyat al-Ilahiyya | Pre-order 2026 | كتاب التجليات الإلهية

1. 

   Rated 5 out of 5

   abrarshahi – May 16, 2026

   السلام علیکم ورحمۃ اللہ وبرکاتہ
   التجلیات الھیۃ پہ سرسری نظر

   الحمد للہ وحدہ والصلوۃ والسلام علی من لا نبی بعدہ۔ اما بعد!
   امام ابن عربی کی کتاب التجلیات کا اردو ترجمہ مارکیٹ میں آیا تو آتے ہی اسے حاصل کرنے کا شوق ہوا اور الحمد للّٰہ آج کتاب موصول ہوئی۔ سرسری طور پہ کتاب کو ایک ڈیڑھ گھنٹے میں دیکھا کہ ترتیب سے ان شاءاللہ تعالیٰ چھٹیوں میں پڑھیں گے۔ بعض خصوصیات جو نظر آئیں وہ قارئین کی نظر کرتے ہیں:
   • بہت سے قارئین اگرچہ ترجمہ والی کتاب خریدتے ہیں لیکن عربی متن سے استفادہ کو بھی پسند کرتے ہیں (جن میں آخری درجہ میں ناچیز راقم بھی ہے) تو متن بھی اس طباعت میں درج ہے اور خصوصیت یہ کہ محقق نے مطبوعہ عربی نسخوں پہ اعتماد کر کے ہی متن درج نہیں کیا بلکہ اصل مخطوطات سے از خود نئے سرے سے تحقیق کر کے متن شاملِ طباعت کیا جو کہ کم از کم میرے لیے تو انتہائی خوشی کی بات ہے اور ہر اس شخص کے لیے بھی کہ جس کا کسی عربی نثر یا نظم کی تحقیق کے ساتھ واسطہ پڑا ہو۔
   • شیخ اکبر کی کتب کا اردو ترجمہ جس انتھک محنت سے فاضل مترجم شیخ ابرار احمد شاھی مد ظلہ کرتے ہیں وہ تو بیان کرنے کی حاجت نہیں ، ان کے تراجم کو پڑھنے والا بخوبی واقف ہے۔ تو اسی محنت و خلوص و تحقیق کو یہاں بھی ملحوظ خاطر رکھا گیا۔
   • کتاب بہر حال مشکل ہے اگرچہ اردو ترجمہ ہی کیوں نہ سامنے آ گیا، اور شیخ اکبر کی کتاب ہو اور آسان ہو سوال ہی پیدا نہیں ہوتا۔ لیکن پھر بھی اسے اس انداز میں اردو کے قالب میں ڈھالا گیا کہ کتاب کسی حد تک سمجھ بھی آجاتی ہے، نہیں تو کم از کم قاری کا کتاب سے تعلق ضرور بنا رہتا ہے۔
   • کتاب کی مشکلات جہاں فاضل مترجم نے دور کرنے کی کوشش کی وہیں ایک خوشخبری یہ کہ کتاب میں خود شیخ اکبر کے شاگرد رشید ابن سودکین کی شرح بھی شامل کی گئی ہے جس سے مشکل مقام حل کرنے میں بہت مدد ملتی یے۔
   • نثر میں کسی بات کو سمجھایا جائے تو بعض دفعہ سمجھنا مشکل ہو جاتا ہے اور اگر اسی بات کو نقشے کی صورت میں سمجھایا جائے تو مزہد آسان ہوجاتی ہے اور اگر اسے تصویر کی شکل دے دی جائے تو وہ سو فیصد نہیں تو نوے فیصد تصویر دیکھنے سے کی واضح ہو جاتی ہے۔ فاضل مترجم نے تصاویر کی شکل میں بات سمجھانے کی جو کوشش کی ہے میرے خیال سے قاری پر سیدھا سیدھا احسان کیا ہے ۔ وللہ درہ۔
   • کتاب کے شروع میں مقدمہ ہے جو *مقدمۃ الکتاب* کی حیثیت رکھتا ہے کہ اسے پڑھ کر کتاب کا موضوع نکھر کر سامنے آ جاتا ہے۔ اور اس موضوع پہ شیخ اکبر کی دوسری تصانیف اور دیگر صوفیا کی کتب میں جو کلام ہے وہ بھی بیان کیا گیا تاکہ قاری کو اچھی طرح موضوع سمجھ آ جائے پھر جب وہ کتاب پڑھے گا تو بات اچھی طرح سمجھنے کے قابل ہو جائے گا۔

   *لھذا کتاب پڑھنے سے تعلق رکھتی ہے۔*

   اللہ تعالیٰ فاضل مترجم کے لیے صدقہ جاریہ بنائے آمین۔بجاہ طہ و یس۔
   والحمد للّٰہ رب العالمین والصلوۃ والسلام علی خاتم الانبیاء و المرسلین ۔

   حافظ شھریار بن جعفر خان
   مقرئ التجوید القراءات العشر الصغری و الکبری و الصغیر والکبیر و الزوائد
   13 مئی 2026ء

2. 

   Rated 5 out of 5

   abrarshahi – May 16, 2026

   محترم جناب ابرار احمد شاہی صاحب !
   السلام علیکم ورحمة اللہ وبرکاتہ

   امید ہے کہ آپ اور آپ کی پوری ٹیم خیریت اور عافیت سے ہوگی۔

   آج آپ کے ادارے ابن العربی فاؤنڈیشن کی جانب سے شیخِ اکبر حضرت محی الدین ابن العربی رحمہ اللہ کی عظیم کتاب “تجلیات الٰہیہ” موصول ہوئی، اور یہ کہنا بے جا نہ ہوگا کہ تجلیات الٰہیہ کا یہ ایڈیشن صرف ایک کتاب نہیں بلکہ ایک خوبصورت علمی اور روحانی پیشکش ہے، جس پر کی گئی محنت ہر صفحے سے نمایاں محسوس ہوتی ہے۔

   اگرچہ ابن العربی فاؤنڈیشن پہلے ہی فصوص الحکم، فتوحاتِ مکیہ، مواقع النجوم اور دیگر عظیم تصانیف پر جس اخلاص، محنت اور علمی بصیرت کے ساتھ کام کر چکی ہے، وہ اہلِ علم پر مخفی نہیں، مگر “تجلیات الٰہیہ” کے اس ایڈیشن نے واقعی دل موہ لیا۔

   خصوصا کتاب کے ہر باب میں جس خوبصورت ترتیب اور فہم انگیز انداز سے ڈائیگرامز اور توضیحی خاکے شامل کیے گئے ہیں، وہ قابلِ تحسین ہی نہیں بلکہ ایک غیر معمولی علمی خدمت ہے۔ اس انداز نے شیخِ اکبر رحمہ اللہ کے دقیق اور عمیق مضامین کو سمجھنے میں بے حد آسانی پیدا کر دی ہے۔ جس سے قاری نہ صرف عبارت کو بہتر انداز میں سمجھ پاتا ہے بلکہ موضوع کے ساتھ ایک خاص ذہنی و قلبی تعلق بھی محسوس کرتا ہے۔

   اسی طرح عربی متن کے ساتھ اُردو ترجمہ جس شستگی، روانی اور خوبصورتی سے پیش کیا گیا ہے، وہ بھی آپ کی علمی دیانت اور زبان پر قدرت کا واضح ثبوت ہے۔ ترجمہ نہ صرف اہلِ علم بلکہ عام قاری کے لیے بھی انتہائی قابلِ فہم اور دلنشین ہے، جو یقیناً ایک بڑی کامیابی ہے۔

   میں دل کی گہرائیوں سے آپ، آپ کی پوری ٹیم، مترجمین، محققین، ڈیزائنرز اور اس عظیم منصوبے سے وابستہ ہر فرد کو مبارکباد پیش کرتا ہوں۔ آپ لوگ محض کتابیں شائع نہیں کر رہے بلکہ ایک عظیم روحانی و فکری ورثے کو نئی نسلوں تک زندہ اور مؤثر انداز میں منتقل کر رہے ہیں، اور یہ یقیناً ایک صدقۂ جاریہ ہے۔

   اللہ تعالیٰ آپ کے اس ادارے کو مزید برکت، وسعت اور قبولیت عطا فرمائے، اور آپ کو اسی طرح اہلِ محبت و معرفت کے لیے علم کے چراغ روشن کرنے کی توفیق عطا فرماتا رہے۔

   والسلام
   محمد احمد انصاری.

3. 

   Rated 5 out of 5

   Danyal Amin (verified owner) – June 2, 2026

   به نور غیب روشن شد دل ما
   منور شد به نورش منزل ما

   تجلی کرد بر ما حضرت او
   چه خوش لطفی که آمد حاصل ما

   شاه نعمت‌الله ولی

   شیخ اکبر محی الدین ابن العربی قدس سرہ نے الفتوحات المکیہ میں ایک مقام پر فرمایا ہے کہ اہلِ اللہ کی معرفت کا دار و مدار سات بنیادی علوم پر ہے، جن میں سے ایک علمِ تجلیات ہے۔ تجلیات کی معرفت، یعنی اشیا میں حق تعالیٰ کے ظہور کا علم، ان بنیادی ابواب میں سے ہے جن کے ذریعے حقائق و معارف کے بے شمار گوشے منکشف ہوتے ہیں۔ ہمارے گرد و پیش موجود اشیا، ان کی ہیئتیں، صورتیں، کائنات میں جاری و ساری تغیرات، اور عالم کے باطنی نظام کے مختلف مظاہر، سب کے سب انہی تجلیاتِ الٰہیہ کے آثار ہیں۔ اسمائے الٰہیہ کے ظہور ہی سے یہ عالم اپنی رنگا رنگی، تنوع اور معنویت حاصل کرتا ہے۔

   شیخ اکبر حضرت ابن العربی قدس سرہ کی تصنیف التجلیات الٰہیہ اگرچہ حجم میں مختصر ہے، لیکن معنوی اعتبار سے نہایت گہری اور ہمہ گیر حیثیت رکھتی ہے۔ زیرِ نظر اشاعت درحقیقت ایک محض ترجمہ نہیں بلکہ ایک مفصل اور جامع علمی مُختصر ہے، جس میں مترجم ابرار احمد شاہی زید مجدہ نے نہایت بصیرت اور علمی ذمہ داری کے ساتھ اس متن کو پیش کیا ہے۔

   اس کتاب کی سب سے نمایاں خصوصیت اس کا تفصیلی مقدمہ ہے، جس میں ابرار احمد شاہی نے تجلی کی حقیقت، اس کے معانی و مطالب، اس کی اقسام، اس کے مراتب اور اس کے مظاہر پر نہایت سیر حاصل بحث کی ہے۔ انہوں نے وضاحت کی ہے کہ تجلی کس طرح عالمِ خارج اور انسان کے باطن دونوں میں ظاہر ہوتی ہے، اور کس طرح ایک ہی حقیقت مختلف صورتوں میں جلوہ گر ہوتی ہے۔ اسی ضمن میں انہوں نے اس اہم نکتے کو بھی نہایت وضاحت سے بیان کیا ہے کہ تجلیات میں تکرار نہیں ہوتی، یعنی حق تعالیٰ ایک ہی صورت میں دوبارہ تجلی نہیں فرماتا، بلکہ ہر تجلی اپنی شان، نسبت اور تعین کے اعتبار سے منفرد اور غیر مکرر ہوتی ہے۔

   اس مقدمے کی ایک نہایت اہم جہت یہ ہے کہ حضرت ابرار احمد شاہی نے صرف توضیح پر اکتفا نہیں کیا بلکہ شیخ اکبر ابن العربی قدس سرہ کے افکار کی تفہیم سے متعلق مختلف آراء اور تعبیرات کا بھی دقیق جائزہ لیا ہے۔ اس ضمن میں انہوں نے حضرت امیر عبدالقادر الجزائری قدس سرہ، حضرت شیخ عبد الکریم الجیلی قدس سرہ، اور حضرت شیخ احمد سرہندی قدس سرہ کے افکار کو ان کے اصل متون کی روشنی میں پیش کیا ہے۔ خصوصاً حضرت شیخ احمد سرہندی قدس سرہ کے مکتوبات سے بھرپور استفادہ کرتے ہوئے انہوں نے تجلیات کے مسئلے کو ایک منضبط علمی تناظر میں واضح کیا ہے۔

   انہوں نے ان آراء کو محض نقل نہیں کیا بلکہ نہایت باریک بینی کے ساتھ ان کا تجزیہ اور تقابل بھی کیا ہے۔ مختلف تعبیرات کو شیخ اکبر ابن العربی قدس سرہ کے فکری نظام کے ساتھ پرکھا گیا ہے، اور جہاں کہیں سوء فہم یا مختلف تاویلات پیدا ہوئی ہیں، ان کی نشاندہی کرتے ہوئے اصل موقف کو دلائل کے ساتھ واضح کیا گیا ہے۔ اس اعتبار سے یہ مقدمہ محض تعارف نہیں بلکہ ایک مستقل تحقیقی و تنقیدی مطالعہ کی حیثیت رکھتا ہے۔

   اس اشاعت کی ایک اہم خصوصیت سیدی ابن سودکین قدس سرہ کی شرح کی شمولیت ہے، جو اس اعتبار سے غیر معمولی اہمیت رکھتی ہے کہ یہ شرح خود شیخ اکبر ابن العربی قدس سرہ کی املاء و ارشادات پر مبنی ہے۔ اس سے متن کی تفہیم کو نہایت مضبوط علمی بنیاد حاصل ہوتی ہے اور قاری کو براہِ راست شیخ کے فکری دائرے سے استفادہ کا موقع ملتا ہے۔

   مزید برآں، اس اشاعت میں عربی متن کو بھی شامل کیا گیا ہے، جو مختلف مخطوطات کے تقابل و تحقیق کے بعد ایک تنقیدی صورت میں مرتب کیا گیا ہے۔ شیخ اکبر ابن العربی قدس سرہ کی بیان کردہ ایک سو نو تجلیات میں سے ہر تجلی کے ساتھ اس کی شرح بھی شامل ہے، جس سے قاری کو متن اور اس کی توضیح بیک وقت میسر آتی ہے۔

   کتاب میں بصری خاکوں اور ڈایاگرامز کا اضافہ بھی کیا گیا ہے، جس سے پیچیدہ فکری اور مابعد الطبیعیاتی مباحث کو زیادہ سہل انداز میں سمجھنا ممکن ہو جاتا ہے۔ طباعت، فونٹ، ترتیب اور مجموعی پیشکش بھی نہایت عمدہ اور دیدہ زیب ہے، جو مطالعے کے تجربے کو مزید مؤثر اور خوشگوار بناتی ہے۔

   آخر میں ابرار احمد شاہی کے علمی کام کی تحسین ناگزیر ہے۔ انہوں نے اس اشاعت میں غیر معمولی محنت، فکری دیانت اور علمی دقت کا مظاہرہ کیا ہے۔ مقدمے کی گہرائی، ترجمے کی صحت، اور کتاب کی مجموعی پیشکش، حتیٰ کہ کور ڈیزائن تک، ہر پہلو میں ایک سنجیدہ علمی ذوق اور جمالیاتی شعور جھلکتا ہے۔ ہم انہیں اس عظیم خدمت پر دلی مبارکباد پیش کرتے ہیں اور دعا گو ہیں کہ اللہ تعالیٰ انہیں درازیِ عمر، برکتِ علم و عمل عطا فرمائے، اور انہیں شیخ اکبر ابن العربی قدس سرہ کی علمی و روحانی میراث کی خدمت کے مزید مواقع نصیب فرمائے۔

   دانیال امين