کسی بھی مصنف کی کوئی بھی تصنیف جن ایام میں لکھی گئی ہوتی ہے وہ اس کے انہی ایام میں پیش آئے احوال کو اپنے اندر سموئے ہوتی ہے۔ اور یہی بات شیخ کی اس کتاب پر بھی صادق آتی ہے۔ سفر مکہ کے ابتدائی ایام شیخ کی زندگی کہ وہ ایام ہیں جب آپ کا کوئی مستقل ٹھکانہ نہیں ہے۔ بس آپ اللہ کے حکم پر سفر میں ہی مصروف ہیں۔ کبھی مصر تو کبھی شام اور کبھی قونیہ وغیرہ۔ پھر آپ کے مالی حالات بھی ان ایام میں ویسے نہیں جیسے پہلے تھے، تو اس کا اثر بھی ہمیں اس کتاب میں دکھائی دیتا ہے، آپ نے اصحاب رسول کے ان احوال کا تذکرہ کیا ہے جو غربت اور مفلسی کی یاد دلاتے ہیں، آپ نے اویس قرنی اور اپنے شیوخ کے وہی احوال زیادہ تر رقم کیے ہیں جو تنگی کی یاد دلاتے ہیں۔ اور ایسا کرنا اس لیے بھی ضروری تھا کہ شیخ اپنے نفس کو یہ نصیحت کر سکیں کہ اگر آج تیری یہ حالت ہے تو یہ کوئی انوکھی بات نہیں بلکہ اہل اللہ کو ہمیشہ سے ہی ان احوال کا سامنا رہا ہے۔ یہی اس کتاب کا اساسی موضوع ہے اور اس کتاب کو شیخ کے انہی احوال کے تناظر میں پڑھنا چاہیے۔ بلکہ میں یہ کہتا ہوں کہ ہر شخص کو یہ کتاب اپنی زندگی کے اُس دور میں پڑھنی چاہیے جس میں اسے بھی اسی قسم کے احوال کا سامنا ہو، تاکہ وہ اس کتاب سے اپنی زندگی کے اس کٹھن دور کو کاٹنے کی ہمت پاسکے۔ کیونکہ بالآخر وقت نے تو گزر ہی جانا ہے لیکن اس وقت میں پیدا شدہ جذبات اور احساسات نے ہمیشہ کے لیےرہ جانا ہوتا ہے۔ الحمد للہ جب سن 2016 سے ہم نے پہلے اِس کتاب کا ترجمہ کیا یا اسے شائع کیا تو ہمیں بھی اسی قسم کے احوال کا سامنا تھا۔ اور اس وقت اس کتاب نے ہمیں کافی تسلی اور تشفی بخشی۔