Ma’arif o Malfuzat Ibn al-Arabi | معارف و ملفوظات ابن العربی از اسماعیل ابن سودکین | 2022

اللہ کا لاکھ لاکھ شکر کہ شیخ اکبر کے معارف و ملفوظات اولین اردو ترجمے کے ساتھ شائع ہونے کی لیے تیار ہیں۔ یہ شیخ کے شاگرد اسماعیل ابن سودکین النوری کا مرتب کردہ مجموعہ ہے۔ یہ اُن اِشکالات کے جوابات ہیں جو شیخ وقتا فوقتا اپنی علمی مجالس میں اپنے قریبی ساتھیوں کو بتایا کرتے تھے۔ عبد اللہ بدر الحبشی کے بعد اسماعیل ابن سودکین شیخ کے ساتھ خادم اور مرید کی حیثیت میں رہے۔ آپ نے شیخ کی بہت سی کتب کی شرح کی اورشیخ کے حوالے سے بہت سی ایسی معلومات لوگوں تک پہنچائیں جو صرف کوئی قریبی ہی جان سکتا ہے۔ اس کتاب میں آپ حضرات مجالس شیخ اکبر کا ایک پہلو جانیں گے۔ آپ کو یہ معلوم ہو گا کہ شیخ اکبر اور ان کے ساتھی اُس دور میں کن معاملات کو ڈسکس کرتے اور شیخ سے سمجھتے تھے۔ ان ملفوظات میں ہمیں شیخ کی حالات زندگی کے چند ایسے گوشے ملتے ہیں جو کسی اور کتاب میں نقل نہیں ہوئے۔ خاص کر شیخ کے ابتدائی معاملات اور جب آپ مکہ میں قیام پذیر رہے، وغیرہ وغیرہ ۔کتاب کا ترجمہ شستہ اور آسان رکھا گیا ہے تاکہ ہر کوئی سمجھ سکے، پھر ہم نے کتاب میں حاشیہ بندی پر خصوصی توجہ دی ہے۔ اکثر ملفوظات کے حاشیے میں اضافی معلومات دی گئی ہیں جن سے اس ملفوظ کا سمجھنا آسان ہو گیا ہے۔ مقصد یہ ہے کہ قارئین کو کچھ نہ کچھ بات سمجھ تو آئے۔ اللہ تعالی سے دعا ہے کہ ہر عام و خاص اس کتاب سے مستفید ہو اور علوم شیخ میں اپنا وہ حصہ پائے جو روز قیامت اُس کے کام آئے۔ آمین یا رب العالمین۔