المحجہ البیضاء کا مطالعہ
عبد العزیز سلطان المنصوب

شیخ اکبر محی الدین محمد ابن العربی کو عرب اور مسلم صوفیا میں سے سب سے زیادہ تحریری کام کرنے والا مصنف سمجھا جاتا ہے۔ ماہرین نے ان کی تصانیف کی تعداد 364 سے زائد بتائی ہے، بلکہ گمشدہ تصانیف کو مستثنیٰ کرنے کے بعد بھی یہ تعداد 550 تک جا پہنچتی ہے، جیسا کہ ڈاکٹر عثمان یحییٰ نے ذکر کیا۔ بعد میں ابن العربی سوسائٹی کے مطابق میسر مخطوطات کے حساب سے یہ تعداد 150 کے لگ بھگ ہے۔

آپ کی تصانیف مختلف موضوعات یعنی اسلامی عربی علوم کے متفرق شعبوں کو شامل کیے ہیں، جن میں تفسیر، حدیث، فقہ، سیرت، تصوف، اور ادب وغیرہ شامل ہیں۔ ہم دیکھتے ہیں کہ اکثر لوگ شیخ کے اس پہلو سے ناواقف ہیں وہ انہیں صرف علم تصوف کا شہسوار ہی سمجھتے ہیں؛ کیونکہ آپ کی اکثر تصانیف اسی شعبے میں ہیں اور محققین و ناشرین کی دلچسپی بھی آپ کی صوفیانہ تصانیف میں ہی ہے۔ یہی وجہ ہے کہ تصوف مخالف ایک جماعت نے شیخ اکبر کے خلاف علی الاعلان دشمنی کا موقف اختیار کیا، یہاں تک کہ ان میں سے بعض نے تو یہاں تک کہہ ڈالا کہ شیخ شریعت کے التزام میں کوتاہی کے مرتکب ہیں۔

 جیسا کہ میں نے فتوحات مکیہ کے تحقیقی مقدمے میں اس جانب اشارہ کیا تھا کہ صوفیا کی ان تحریروں کا منظر عام پر نہ آنے سے عربی، اسلامی اور انسانی مکتبات کو ناقابل تلافی نقصان ہوا ہے۔ کہ علم کے متلاشی محققین نے اِن اہم شعبوں میں اِن کے علم سے مزید جاننے کا موقع کھو دیا ہے۔ میں جامعات کے تحقیقی مراکز، ریسرچ انسٹی ٹیویٹس، صوفیائے کرام، محققین سکالرز، اور اشاعتی اداروں سے اپیل کرتا ہوں کہ وہ شیخ کی تمام کتب کی نہ صرف تحقیق کریں بلکہ ان کی اشاعت میں اپنا کردار بھی ادا کریں۔

مجھے خوشی ہے کہ ’’ابن العربی فاؤنڈیشن، پاکستان‘‘ کے موسس، محترم استاذ ابرار احمد شاہی صاحب نے اِس سمت پہلا قدم اٹھایا ہے۔ وہ اس طرح کہ ہمیں اس کتاب ’’المحجہ البیضاء” کا ایک قلمی نسخہ فراہم کیا، جیسا کہ عنوان سے ظاہر ہے، یہ کتاب اسلامی فقہی مذاہب کے آئمہ کے ارشادات کے مطابق اسلامی فقہ اور دینی آداب کے موضوع سے تعلق رکھتی ہے، لیکن اِس کی بنیاد احادیث نبویﷺ پر ہے۔